Smástirni nefnt eftir Grindavík
Hróður Grindavíkur berst ekki aðeins um Jörðina heldur út í sólkerfið
Smástirni sem fannst árið 1999 hefur verið verið gefið nafnið (24090) Grindavík. Alþjóðasamband stjarnfræðinga, sem heldur utan um örnefni í sólkerfinu, samþykkti nafnið nú í ágúst eftir að bærinn komst í heimsfréttirnar í eldgosunum á Reykjanesskaga. (24090) vísar til raðnúmers smástirnisins í skrá Minor Planet Center.
Smástirnið fannst í Catalina Sky Survey verkefninu í Arizona í Bandaríkjunum þann 29. október árið 1999. Var því þá gefið tímabundna skráarheitið 1999 UY8.
Hvar er (24090) Grindavík?
(24090) Grindavík er í smástirnabeltinu milli Mars og Júpíters. Meðalfjarlægð þess frá sólu er 2,3 stjarnfræðieiningar eða 345 milljónir kílómetra sem er rúmlega tvöföld fjarlægð Jarðar frá sólu.
Grindavík ferðast einn hring um sólina á 3,57 árum eða þremur árum, sex mánuðum og þremur vikum. Sporbrautin hallar um 5 gráður miðað við sporbraut Jarðar.
Hér er hægt að fylgjast með ferðalagi (24090) Grindavík í sólkerfinu.
Hvað er vitað um (24090) Grindavík?
Mjög lítið er vitað um (24090) Grindavík annað en sporbrautina sem er vel þekkt. Birta þess (15,1) og endurskinshlutfall (0,159) benda til þess að smástirnið sé í kringum 3 km á breidd. Endurskinshlutfallið bendir einnig til þess að smástirnið sé úr einhvers konar blöndu bergs og málma.
Grindavík á Jörðinni, Mars og smástirnabeltinu
Grindavík er þó ekki aðeins að finna á Jörðinni og í smástirnabeltinu, heldur líka Mars. Á norðurhveli rauðu reikistjörnunnar er 12 km breiður gígur sem ber nafn bæjarins. '
Sævar Helgi Bragason er vísindamiðlari, fyrirlesari, rithöfundur, þáttastjórnandi og eigandi og ritstjóri icelandatnight.is og solmyrkvi2026.is.
